Itangazo ry’Amahame ngenderwaho hagati ya “AFC/M23” na Repubulika iharanira demukarasi ya Kongo babifashijwemo na Qatar

Byanditswe na HAKIZIMANA Maurice

• Share on Facebook
• Share on X
• Share on WhatsApp
• Share on Instagram

Source: Qatar Govt

19 Nyakanga 2025

ITANGAZO RY’AMAHAME Y’INGENZI HAGATI Y’INTUMWA ZA LETA YA REPUBULIKA IHARANIRA DEMOKARASI YA CONGO N’INTUMWA ZA ALLIANCE FLEUVE CONGO/ MOUVEMENT DU 23 MARS (AFC/M23) (IMPANDE ZOMBI), MU RWEGO RWO GUTEGURA AMASEZERANO Y’AMAHORO ARAMBUYE, YAKOZWE BIFASHIJWEMO N’IGIHUGU CYA QATAR

---

I. AMAHAME RUSANGE

Impande zombi zemera ko amahoro arambye ari ryo shingiro ry’iterambere, ubumwe n’umutekano w’Igihugu, ku nyungu z’abaturage ba Repubulika Iharanira Demokarasi ya Congo.

Zishingiye ku mahame y’ingenzi agenga Itegeko Nshinga rya Repubulika Iharanira Demokarasi ya Congo, Amasezerano y’Umuryango w’Afurika Yunze Ubumwe, Amasezerano y’Umuryango w’Abibumbye n’Imyanzuro y’Umuryango w’Abibumbye ijyanye n’iki kibazo, ndetse n’amategeko mpuzamahanga, impande zombi zemeza ko zifite ubushake bwo gukemura amakimbirane binyuze mu nzira z’amahoro, ku nyungu zo kurengera abaturage b’iki gihugu.

Impande zombi ziyemeje gukorana byimbitse n’imiryango mpuzamahanga n’iy’akarere kugira ngo babashe kurengera abasivile no gushyira mu bikorwa iri tangazo ry’amahame.

Ziyemeje kandi gukemura amakimbirane hakoreshejwe uburyo bwa dipolomasi n’ibiganiro, aho gukoresha imbaraga cyangwa amagambo ya gashozantambara, bijyanye n’imihati y’amahoro ishyirwaho na EAC-SADC, nk’uko byemejwe n’Umuryango wa Afurika Yunze Ubumwe.

Ziyemeje gusiga inyuma amateka mabi no gutangira igice gishya cy’ubwumvikane, ituze n’ubusabane.

Ziyemeje kurenga amacakubiri asenya ubumwe bw’igihugu, kunoza imibereho y’abaturage no kwirinda amagambo apfobya akanasebya umuntu, hagamijwe amahoro n’ubwiyunge. Ziyemeje kandi gushyigikira ubusugire bw’igihugu n’ubwigenge bwacyo.

Impande zombi zemeje kongera gushimangira ibyo zemeye mu Itangazo ryabo ry’Itariki ya 23 Mata 2025.

---

II. IGIHAGARARO KIHORAHO CY’IMIRWANIRE (CESSEZ-LE-FEU)

Impande zombi zemeza ko amahoro, umutekano n’ituze ari ibanze kugira ngo habeho iterambere, imibereho myiza n’icyubahiro cya muntu.

Ziyemeje guhagarika burundu imirwano, harimo ibi bikurikira:

• Ibitero mu kirere, ku butaka, mu mazi no mu biyaga, kimwe n’ibikorwa byose by’ubusahuzi cyangwa kwangiza;
• Ibikorwa by’amacakubiri n’amagambo y’urwango;
• Kugerageza kwigarurira ibindi bice hakoreshejwe imbaraga.

Ziyemeje ko iri hagarikwa ry’imirwano rigomba kubahirizwa n’imirwi yose yitandukanije iri muri uru rugamba. Hazashyirwaho urwego rw’ubugenzuzi n’iyubahirizwa rizagena uburyo iri hagarikwa rizashyirwa mu bikorwa neza.

Impande zombi bemeranyije ko zitarakora igikorwa na kimwe cyadindiza ishyirwa mu bikorwa ry’iri hagarikwa ry’imirwano.

III. INGAMBA ZO GUSHYIRAHO ICYIZERE

Impande zombi ziyemeje gufata ingamba zitanga icyizere mu baturage ba RDC no gushyiraho ibisabwa kugira ngo ibiganiro by’amahoro birambye bishoboke.

Zagaragaje ko ari ingenzi kwihutisha no kugira ubwitange mu gushyira mu bikorwa izo ngamba, kuko ari zo zubaka icyizere n’umusingi w’amahoro.

Ziyemeje gushyiraho ibikenewe byose kugira ngo ibyo bikorwa bishoboke. Muri byo harimo:

• Gushyiraho urwego ruhuriweho rugenzurwa na Komite Mpuzamahanga y’Umuryango utabara imbabare(Croix Rouge/CICR), ruzaendera ku mategeko ya Leta ya Congo, rugamije gufungura abanyururu bamwe na bamwe cyangwa abafunze bazwi b’ingenzi bashobora kuba bafitwe n’impande zombi.

IV. GUSUBIZAHO UBUTEGETSI BW’IGIHUGU

Impande zombi zemeza ko kongera gusubizaho ubutegetsi bwemewe bwa Leta ari ikimenyetso cy’uko impamvu z’amakimbirane zakemuwe binyuze mu masezerano y’amahoro.

Ziyemeje ko gusubizaho ubutegetsi bwemewe bwa Leta ku butaka bwose bw’igihugu ari ingenzi mu masezerano y’amahoro, kandi ko ayo masezerano azagena uburyo n’inzira bizakurikizwa.

V. GUTAHURA ABAHUNZE N’ABAKUWE MU BYABO BARI MU GIHUGU IWABO

Impande zombi ziyemeje korohereza no gutegura neza itahuka ry’abahunze n’abakuwe mu byabo bari mu gihugu imbere, ku bushake bwabo, mu mutekano n’icyubahiro, bagasubira mu ngo cyangwa mu bihugu bakomokamo, hakurikijwe amasezerano y’impande eshatu: RDC–Igihugu cyatanze ubuhungiro –HCR. Ibi byose bizakorwa hubahirizwa amategeko mpuzamahanga y’ubutabazi.

VI. MONUSCO N’ANDI MAHURIRO Y’AKARERE

Impande zombi bemera mu mahame yazo ko ari ngombwa kurinda, gufasha no guteza imbere umutekano w’abasivile, no gushyira mu bikorwa ihagarikwa ry’imirwano, bakemera kubifashwamo na MONUSCO n’andi mahuriro y’akarere, bitewe n’uko byumvikanywe mu buryo bw’ubugenzuzi.

VII. AMASEZERANO Y’AMAHORO

Impande zombi zemeza ko ari ingenzi kugira amasezerano y’amahoro agamije gutanga umutekano, iterambere rirambye, ubutabera bw’imibereho, kurinda uburenganzira bwa muntu mu gihugu cya RDC, no kugarura impunzi mu buryo bwizewe kandi bubaha icyubahiro, hagakemurwa n’imizi y’amakimbirane.

Ziyemeje gutangira gushyira mu bikorwa iri Tangazo ry’amahame rikimara gusinywa, ariko bitarenze tariki ya 29 Nyakanga 2025.

Ziyemeje kandi gutangira ibiganiro byihutirwa nyuma yo gushyira mu bikorwa iri Tangazo, hagamijwe gutangira amasezerano y’amahoro bitarenze tariki ya 8 Kanama 2025. Ibyo biganiro bigomba guhuzwa n’Amasezerano y’amahoro yashyizweho umukono hagati ya RDC n’u Rwanda i Washington, ku ya 27 Kamena 2025.

Ziyemeje kuganira ku masezerano arambuye y’amahoro mu mwuka w’ubushishozi n’ubufatanye, bagamije kumvikana no kuyasinya bitarenze tariki ya 18 Kanama 2025.

Impande zombi zashimiye igihugu cya Qatar ku ruhare rwacyo rw’ingenzi mu korohereza ibiganiro byagejeje kuri iri Tangazo.

Zagaragaje ugushimira uruhare rw’Amerika mu gushyigikira ibiganiro by’amahoro byabereye i Doha.

Zashimiye kandi Umuryango wa Afurika Yunze Ubumwe ku ruhare wagize kuva umushinga w’amahoro watangira, n’ubwiyemezi bwawo bwo gukomeza gushyigikira ituze n’ubwiyunge mu karere.

Bishyiriweho umukono i Doha, mu gihugu cya Qatar, ku wa 19 Nyakanga 2025, mu duce tubiri, mu ndimi y’Icyongereza n’Igifaransa.

KU RUHANDE RWA LETA YA REPUBULIKA IHARANIRA DEMOKARASI YA CONGO
Bwana Sumbu Sita Mambu
Intumwa Nkuru y’Umukuru w’Igihugu,
Ishinzwe ibiganiro bya Luanda na Nairobi

___________________________________________________________________________________________________

KU RUHANDE RWA ALLIANCE FLEUVE CONGO / MOUVEMENT DU 23 MARS (AFC/M23)
Bwana Benjamin MBONIMPA
Umunyamabanga Mukuru wa AFC/M23

_______________________________________________________________________________________________________

SOMA nanone:Amasezerano y’amahoro hagati ya Repubulika Iharanira Demokarasi ya Kongo (RDC) na Repubulika y’u Rwanda (Inyandiko yose uko yakabaye)

Iyi si

Mwalimu HAKIZIMANA Maurice II Kunkurikira kuri WhatsApp  Whatsapp https://whatsapp.com/channel/0029VaCyM5ILdQejDYwQ2b2u II  Kunkurikira kuri page facebook: https://www.facebook.com/professormaurice/