Hakizimana Maurice
Iri ni isomo ryoroheje rya métabolisme( imibereho n’imikurire y’ikinyabuzima),hano turibanda ku muntu. Ese wari uzi ko kwiyocosha inzara[ “kwiyiriza”,jeune/fasting] nibura rimwemu cyumweru ari umuti karemano urokora ubuzima bwawe?
Umubiri w’umuntu ni nk’uruganda (factory) rukomeye rukora akazi kenshi kandi rudasakuza,rutananduza ikirere, aho imirimo imwe n’imwe iba igomba guhagarara akanya gato kugira ngo rukomeze gukora neza.
Wari uzi ko inyamaswa nyinshi iyo zirwaye zirekeraho kurya (zifata ka konji) zikaruhuka bihagije, zikisubiranya neza, zigasubirana amagara mazima?
Wari uzi ko umurima uhingwa ugera aho ugakenera kurazwa (gufata ka konji) umwaka wose cyangwa myinshi ukongera kwisubiranya neza ukera neza kurushaho?
None se kuki twe abantu dukunda kwishyira hejuru ya kamere (nature) tukarya tukanywa ubutaruhuka no mu gihe turwaye,no mu gihe bitari ngombwa?
JYA UMARA AMASAHA 24 UTARIYE, UTANYWEYE,RIMWE MU CYUMWERU
Buri muntu wese ukuze,aba agomba kugira umunsi umwe gusa mu cyumweru agaha igifu n’amara bye ka konji k’umunsi umwe, ubwo ni iminsi ine mu kwezi,ariko idakurikiranye [muri siyansi byitwa “Intermittent fasting“/”jeûne intermittent“].
Muri ayo masaha 24 yose, ushobora gusa kunywa amazi atarimo ikindi kintu.Amazi afasha urwungano ngogozi kwisukura no kwivugurura muri uwo mwanya kuko yo adakeneye kugogorwa!Cyangwa nayo ukayihorera rwose!!
BIMAZE IKI?
(1) BITUMA UGABANYA IBIRO
Burya turemwe mu buryo butangaje.Ibiryo turya/ibinyobwa tunywa byubaka umubiri, tukabyibuha, umubiri ukibikira ibizawugoboka mu bihe bibi[ibicece byo ku nda,amavuta yo ku itako n’amaboko,ikibuno,…ni ububiko bukomeye bw’ibinure (fat) n’amasukari byatunga umubiri iminsi myinshi atariye]
Kwiyiriza ubusa bifasha umubiri gukoresha ibinure nk’ingufu ( zo mu bwoko bwa energy) wabitse aho kugusaba isukari.Ibi bigabanya ibinure n’ibiro kurusha gukora siporo urya!Byongera cyane imikorere y’umubiri (metabolisme). Iyo urwungano ngogozi rufashe akaruhuko, rukoresha ingufu ( zo mu bwoko bwa calories)rwabitse .
(2)BITUMA IGIFU N’AMARA BIMERERWA NEZA
Kwiyiriza ubusa bituma igifu n’amara(urura ruto,urura runini) bikora neza, bityo imikorere y’umubiri ikomeza kugenda neza. Biraruhuka, bikisukura.
(3)BITUMA UBWONKO BUKORA NEZA
Kwiyiriza ubusa bifasha ubwonko,byongera ubwenge!Ubwonko burekura ama proteyine yitwa facteur neurotrophique dérivé du cerveau (FNDC/BDNF mu cyongereza=brain-derived neurotrophic factor).
Facteur neurotrophique dérivé du cerveau (FNDC/BDNF mu cyongereza=brain-derived neurotrophic factor.
Iyo proteyine ifasha uturemangingo fatizo tw’ubwonko guhindukamo uturemangingo fatizo duhererekanya amakuru ku bwonko tuzwi nka neurones, ndetse n’indi misemburo ifasha mu ihererekanya makuru ku bwonko; ibi byongera ubwenge,gufata mu mutwe,no gutekereza neza! Binarinda indwara z’ubwonko nka Alzheimer na Parkinson, indwara zitera kwibagirwa n’amazinda!
(4)BIGABANYA IBYAGO BYO KURWARA DIYABETE,BYONGERERA INGUFU INSULINE MU MARASO!
Ubushakashatsi bwerekanye ko iyo wiyiriza ubusa bifasha umusemburo karemano wa insuline (umusemburo uringaniza isukari mu mubiri) guhanahana neza amakuru n’uturemangingo mu gukura isukari nyinshi mu maraso, isukari yangiza uturemangingo kugera ubwo turwara diyabete,bigasaba guterwa insuline z’inkorano mu maraso.
(5)BITUMA UTEKEREZA NEZA(meditation)
Iyo mu gifu nta biryo birimo, bituma umubiri ugira imbaraga.Uruganda ngogozi rukoresha imbaraga nyinshi. Iyo utaremerewe mu gifu, kandi ubwonko buri gukora cyane bituma wita cyane ku bagukikije, ibigukijije, ugatekereza neza ku buzima.
(6) BYONGERERA UMUBIRI UBUDAHANGARWA [immunité]
Kwiyiriza ubusa bifasha abasirikare b’umubiri kuturwanyiriza indwara, bagasohora imyanda y’uburozi nk’igihe twariye ibitameze neza, bagakuraho ububyimbirwe butandukanye ndetse bakirukana uturemangingo na za virusi byadutera indwara,harimo na kanseri.
(7)BITOZA UMUBIRI KWIHANGANIRA INZARA
Kwitoza kutarya,bitoza umubiri n’ubwonko kwihanganira inzara,ubwonko bubifata vuba. Nyuma yaho,uzajya ubasha kumara amasaha atanu ndetse atandatu utarumva inzara!!
Uwo mwitozo ukurinda “kuryagagura” (grignoter) bigafasha kuringaniza imisemburo ituma ugira inzara, kuko uko ugenda wiyiriza, ariko imisemburo igenda yiringaniza ku rugero nyarwo, bityo bikagufasha kuba wamara igihe kinini utararya,utarumva inzara!
(8)BIFASHA URUHU GUSA NEZA NO KUDASAZA IMBURAGIHE
Uruhu rusa neza,amavuta agafataho rwose kandi birwanya iminkanyari.
UMWANZURO
Niba ubishaka,tangira gufata umunsi umwe mu cyumweru umare amasaha 24 utariye utanyweye (keretse amazi yonyine atarimo ibindi bintu). Ariko ibi ntibireba abarwaye indwara zitabyihanganira! Kuri abo, ushobora gutangirira ku masaha 12 gusa, kugeza igihe uzabasha kumara 24. Abagore batwite, abonsa, n’abana bato cyane ibi ntibibareba!
Mukomeze kugira ibihe byiza!
IYI SI,
Komeza gukurikira uru rubuga rwigisha uzamenya byinshi ukeneye mu buzima bwa buri munsi.
Dukurikire ku rubuga rushya rwa Whatsapp IYI SI https://whatsapp.com/channel/0029VaCyM5ILdQejDYwQ2b2u
Dukurikire kuri Youtube kuri IYI SI talk Show https://youtu.be/NbOmqOTZ6yE
Injira muri groupe facebook https://www.facebook.com/groups/565816492326178/?ref=share
Injira muri groupe WhatsApp https://chat.whatsapp.com/CIc4qkwAzWz2Fa0F68JBGk
HAKIZIMANA MAURICE ni umwarimu w’umwuga (Master II MEEF/Sciences de l’Education/Sciences sociales/Sociologie) Université Catholique de Paris/Sorbonne Université,mu Bufaransa.Wamukurikira kandi kuri : chaîne ya Whatsapp, Facebook, Twitter na Instagram