Kuri wowe Havilah Balsam Kha’ris – Mfula yanjye

Tariki ya 14 Nyakanga 2025 – i Paris
Umwanditsi: HAKIZIMANA Maurice

Kana kanjye,rukundo rwajye, ni jyewe, so ugukunda

Gahungu kanjye, nari,ndi, kandi nzahora ndi so ugukunda .
Mfula yanjye, uzahora uri impamvu y’ukubaho kwanjye.
Gisore cyiza, nagukunze nkikurabukwa urya munsi usesekara ku isi wari mwiza bihebuje

Oh Bura bwanjye, hari ku cyumweru cyo kuwa makumyabiri n’ine werurwe umwaka w’ibihumbi bibiri na cumi n’icyenda, mu gicuku cya joro, ijoro ryahinduye ubuzima bwanjye.

Musore w’igitinyiro, nzagukunda kugeza ku munsi wanjye cyangwa wawe wa nyuma.
Mutima wanjye, kandi nakwise amazina atatu akungahaye koko: Havilah, Balsam, na Kha’ris.

Ntega amatwi, Havilah wanjye, mfula yanjye,rukundo rwanjye

Uri Havilah: kuri njye uri igihugu cyose, igihugu cyiza kinini koko,cyuzuyemo zahabu nziza.
Uri Havilah, igihugu cyiza kirimo zahabu nziza,umubavu uhumura neza wa budola,amariragege atama neza bihebuje, igihugu cyuzuye amabuye y’agaciro ya Onigisi.
Uri Havilah, kandi agaciro kawe ntikabarwa mu mafaranga, mu ifeza no mu izahabu: ntugereranywa, uri rudasumbwa,undutira byose, nkwise kirenga kuko uri imbonekarimwe.
Uri Havilah, kuko uri byose kuri jye: umutungo wanjye, ubukungu bwanjye,umunezero wanjye,ubwiza butagira uko busa!
Uri Havilah -kuri jye, kuri so, bivuze ubutunzi buruta ubw’isi yose,ubw’isanzure ryose.
Havilah-Ndagukunda n’umutima wanjye wose. Nzatanga byose ngo ukomeze kunezerwa iteka ryose. Naba mpari naba ntahari,nzaguhora hafi,Iteka n’iteka!

Tega amatwi, Balsam, mfula yanjye,mbaraga zanjye wowe ubushobozi bwanjye bwo kubyara bwatangiriyeho.

Uri Balsam: Uri balsamine yanjye, uri ihumure ryanjye, uri impumuro y’umutima wanjye, uri umubavu utama neza, uri amavuta avura yunga imvune, uri agatambaro gahanagura amarira y’ishavu ryanjye, uri igisubizo cy’ibikomere byanjye. Ni wowe wunze imvune yo muri roho yanjye, yo mu misokoro yanjye iyo kure cyane mu magufwa yanjye.

Uri Balsam waje mu buzima bwanjye nyuma yo kwicwa, nyuma yo guhondagurwa n’abagabo buzuye ishyari, ububi n’ubusagwe,abagabo b’ipantalo banigirije za karuvati batihanganira kureba no kumva ibibasumba byose,Ba ndamirinda b’ibigwari bakora iyo bwabaga ngo batone ku muhire n’abahire b’i Buharankakara.Bahora biteguye gucakira uwo bashumurijwe nabo igihe cyagera bagafatwa mu ngoto.
Uri Balsam, uri umuti womora ibikomere byanjye waje usanga bikivirirana, ibikomere byo mu mutima, mu bwenge, mu misokoro, mu mubiri.
Uri Balsam, ya mavuta meza y’ugusigwa, ya yandi Imana yo muri cya gitabo yigeze gusaba mu gihe cyahise.

Uri Balsam, izina ryiza nakuye mu giheburayo beʹsem,na ba·samʹ, bivuga “impumuro nziza”.
Ni yo mpamvu uri amavuta meza amvura akambera n’impumuro nziza, impumuro nziza inezereza umutima.

Balsam, mfula yanjye naguhaye iri zina ntekereza kuri iki kibazo : “Ese nta muti uvura ibikomere uba i Gileyadi? Cyangwa nta muntu uvura uhaba?” (Yeremiya 8:22)
Balsam maraso yanjye, igihe umutima wanjye, ibitekerezo byanjye n’ubugingo bwanjye byari byibereye i Gileyadi, ari bwo umuvandimwe aho babuze, uyu wiyita “Munyampuhwe” jye nita “Nta mpuhwe” na “Nta roho” yampanuye mu igorofa rya cumi nkagwa nubamye, akamanuka akanshingamo inkota ngo aha ntazanzamuka, maze akanyikoreza batandatu inkubwe ebyiri ku mutwe no mu mva ngo “piii, gapfe upfuye iby’incuti biragoye”! Bavuye aho barakaraba bakomanya ibirahure bati “ku buzima bwacu” bararya baranywa bati “turagakoze yee! Karosi uyu azashyika Gileyadi binyuze mu zihe nzira se?”
Ntiyari azi nako ntibari bazi ko uzaza, ko uzansubiza icyizere, ko uzampa umunezero ntigeze mbere hose.
Balsam “cyomoro” cy’umutima wanjye, sinagiye i Gileyadi y’iwabo iyo, ariko wowe wabaye Gileyadi yanjye, Balsam wanjye,muti womora. Waranyomoye, nongera kumwenyura,nongera kubaho.Uri umuzuko wanjye.

Tega amatwi, Kha’ris wanjye,Nema yanjye.

Uri Kha’ris-Impano,ingabire n’Inema bitagira uko bisa, impano yavuye mu ijuru inyuze mu ngobyi yuje urukundo ya mama wawe, akitwa Grâce (Garatsiya) bivuga Kha’ris-Ubuntu butagereranywa.

Uri Kha’ris, impano iva ku Mana, uwo Rurema yagaragarijemo urukundo rwayo rutagereranywa.
Uri Kha’ris, ineza ihabwa uwatekerezaga ko atanagikwiriye kubaho.Impano nziza ku wihebye!
Uri Kha’ris, izina ryiza nagukuriye mu Kigereki kharisma, bivuga impano itaguzwe, impano itunguranye, y’igiciro kirenze icyo wabona.
Uri Kha’ris, baho nk’izina ryawe, ba Karisi-matike (charismatique), umuntu w’abantu n’ubuntu.

Uri Kha’ris, baho :

— uhumuriza bose,
— uvugira abandi mu ijwi riranguruye,riryoheye amatwi,
— utsinda ibicantege,nta kurambirwa,urangwa n’icyizere
— uba umugabo w’akanyamuneza ukeye mu maso,
— ureba imbere cyane,uhorana inzozi nziza kandi ukazikabya
— uba intangarugero muri byose,wegerwa na benshi

Uri Kha’ris, uzahore uri urumuri rw’abandi,izuba rirasira mu mitima yijimye!

Uri Kha’ris, uri nka Garatsiya wakumpaye, uri imbabazi, uri imbamutima, uri urukundo rudashira.
Uri Kha’ris, uri umurage w’ineza itagereranywa, imvano y’impuhwe, uzubake igisekuru cy’urukundo rudacogora.

Havilah, Balsam, Kha’ris — uri byose kuri jye.

Uri jyewe mu ishusho ntoya.
Uri muri jye n’iyo twatandukanywa n’ibihe,uzahora muri jye.
Uri umutima wanjye nkaba uwawe,imitima yacu ivuga rumwe.
Uri amaraso yanjye atembera mu mitsi yawe, umutima wawe uterera mu wanjye.
Uri umwana wanjye w’igikundiro, ndi muri wowe, nawe ukaba muri njye.
Ndi wowe, uri jye. Kuko amaraso atari amazi!

Havilah -Butunzi bwanjye,

Balsam-Muti womora ibikomere byanjye,

Kha’ris- Mpano yanjye,Bura wanjye

— ndi so. Nzahora nkurinda. Ijwi ryanjye rizahora mu matwi yawe.
Balsam, nk’uko Mwana na Data bari — ndi muri wowe, uri muri jye. Turi umwe iteka ryose.

Yari So ugukunda ubuziraherezo.
Paris, Kuwa ya 14 Nyakanga 2025

🖋️ Byanditswe na Mwalimu HAKIZIMANA Maurice
📲 Nkurikira kuri WhatsApp: WhatsApp Channel
📘 Sura urubuga rwanjye rwa Facebook: Facebook Page