Paul Kagame Perezida wa Repubulika y’u Rwanda: Ubuzima bwe,Igihugu cye, n’Amashuri ye

HAKIZIMANA Maurice

Yitwa Paul Kagame, yavutse tariki 23 Ukwakira 1957 avukira ku musozi wa  Nyarutovu, Komini ya Tambwe, Perefegitura ya Gitarama, hafi y’umugi muto wa Ruhango mu gihugu cyitwaga Ruanda-Urundi. Paul Kagame abasirikare be bita “Afande” buri wese ntabaze ngo ni nde (kuko habaho Afande w’Abafande umwe gusa); abakozi be mu nzego zose za gisivili bakamwita “Hizi Egiselensi”(His Excellency) bakamenya uwo bavuze (kuko habaho Hizi Egiselensi umwe gusa mu gihugu); ni umugabo w’umunyepolitike wo mu Rwanda, akaba perezida wa Repubulika kuva tariki ya 24 Werurwe 2000 (umwanya amazeho imyaka isaga 24) nyuma yo kuba visi perezida wa Repubulika na Minisitiri w’Ingabo kuva mu mwaka wa 1994 kugeza muri 2000. No muri icyo gihe ariko, ni we wari « l’homme fort du Rwanda » (Kizigenza mu Rwanda).

II Ushobora kunkurikira ku rubuga rwa whatsapp  channel on WhatsApp: https://whatsapp.com/channel/0029VaCyM5ILdQejDYwQ2b2 II

Umunyapolitike Paul Kagame yatorewe (n’abadepite) kuba Perezida wuzuye muri 2000, nyuma  yiyamamaza muri 2003 (ahabwa amajwi 95,1%), arongera yiyamamaza muri  2010 (ahabwa amajwi 93,08%), ariyongeza yiyamamaza muri 2017 (ahabwa 98,79%) ndetse arongera ariyamamaza no muri 2024 (ahabwa amajwi 99,15%).

Paul Kagame tariki ya 6 Nzeri 2010 arahirira manda ye ya kabiri muri sitade Amahoro i Remera

Dore urutonde rw’ababaye ba perezida bose muri Repubulika y’u Rwanda mu Mateka.

Ababyeyi be ni bantu ki?

Ni umwana wa bucura wa bwana Deogratias Rutagambwa (Se Rutagambwa ni mwene  Kampayana mwene Cyigenza mwene  Rwakagara  mwene Gaga mwene  Mutezintare wa Sesonga mwene   Makara wa   Kiramira mwene  Mucuzi mwene  Nyantabana wa Bugirande mwene Ngoga wa  Gihinira mwene Makara mwene Ndiga wa  Gahutu ka  Serwega mwene  Mututsi (wo mu bwoko nzu y’abega b’Abakagara).Se yari umworozi, wo mu miryango y’abatware bo ku ngoma za Cyami.

 Nyina Asterie Bisinda (wo mu bwoko nzu y’Abahebera b’Abanyiginya) yari mwene Mukakimanuka Drocella umukobwa wa Ntagwabira mwene Rwangeyo rwa Nyirindekwe wa Yuhi IV Gahindiro Umwami w’u Rwanda. Naho Kanamugire, Sekuru ubyara Asterie Bisinda yavukanaga mu nda imwe na Gatsinzi Martin, Se w’Umwamikazi Rozaliya Gicanda umugore w’Umwami w’u Rwanda  Mutara III Rudahigwa.  Haba kuri se haba kuri nyina Paul Kagame ni uwo mu miryango y’ingoma za cyami.

Yakuriye he?

Mu mwaka wa 1961,igihe yari afite imyaka ine gusa, umwana w’umuhungu witwaga Paul Kagame yahunganye n’ababyeyi be bahunga umujinya n’itotezwa ry’abaharaniraga ubwigenge. Muri 1959 habaye Impinduramatwara ryiswe « Revolisiyo y’i 59 » aho abahoze ari abagaragu b’iyi miryango ya cyami batoteje kandi bagatwikira abari abatware babo bigatuma bahunga igihugu,bamwe bakicwa.Umuryango wa Rutagambwa wahungiye ahitwa Gahunge, mu Ntara ya Toro, mu gihugu cya Uganda. Aho ni ho Paul Kagame yakuriye.

Ese Paul Kagame agira Dipolome,Yarize? 

Igihe yari afite imyaka 9 nibwo yatangiye amashuri abanza yari mu nkambi. Abamuzi bavuga ko yari umuhanga cyane mu ishuri. Muri 1972 yatangiriye amashuri yisumbuye mu kigo cyiza cyajyagamo abana b’abahanga gusa cyitwa Ntare School giherereye Mbarara, hanyuma yimurirwa mu kigo cya  Old School Kampala kugeza muri 1976. Ni ukuvuga ko yize imyaka ine y’amashuri yisumbuye maze kubera urupfu rwa se hamwe n’ubuzima bwari bugoye,ahagarika ibyo kwiga ajya mu mutwe w’Inyeshyamba zari ziyobowe n’umugabo  w’umunya Uganda Jenerali Yoweri Kaguta Museveni Tibuhaburwa  wari ufite ibirindiro muri Tanzaniya. Uyu yahabwaga ibikoresho byose by’intambara,imyitozo, amafaranga n’ubuvugizi na Leta zunze ubumwe za Amerika.

Paul Kagame muri Korea y’Epfo ahabwa impamyabushobozi ya dogitora y’icyubahiro (PhD Honoris causa) muri ‘Public policy and Management’.

Paul Kagame mu nyeshyamba za Uganda

 Bigitangira, intambara Yoweri Kaguta Museveni Tibuhaburwa yatangije kuri Uganda yari igamije gukuraho Perezida Idi Amin Dada. Uwo mutwe w’inyeshyamba ze waje kwitwa NRA, bisobanura National Resistance Army. Paul Kagame kimwe n’abandi bana abasore n’inkumi benshi b’abatutsi bari barahunze Repubulika binjijwe ku bwinshi muri uwo mutwe, maze bakomeza kurwana, n’igihe Idi Amini Dada yari atakiri perezida, maze muri 1985 bakuraho uwamusimbuye, ari we perezida Milton Obote, bakomeza kurwana kugeza ubwo muri 1986 bakuyeho n’uwasimbuye Milton Obote, ariwe perezida  Tito Okello.

Fred Rwigema na Paul Kagame bari incuti za hafi kuva mu bwana bwabo kandi ntibasiganaga

Intambara irangiye muri 1986, Jenerali Yoweri Kaguta Museveni Tibuhaburwa yabaye Perezida wa Repubulika ya Uganda maze abari Abanyarwanda bamurwaniriye mu ishyamba bose abagira Abanya Uganda ndetse abaha amapeti yo hejuru mu ngabo za Uganda. Uwari mukuru muri bo yari Jenerali Fred Gisa Rwigyema wagizwe Minisitiri wungirije  w’ingabo za Uganda. Tukiri kuri Paul Kagame,we yambitswe ipeti rya  Major  mu ngabo za Uganda kandi agirwa Umuyobozi wungirije w’Urwego rw’Igihugu rushinzwe iperereza rya gisirikare.

Paul Kagame umurwanyi byahamye

Muri Kamena 1990, Major Paul Kagame yoherejwe muri Leta zunze ubumwe za Amerika gukora amahugurwa y’ubuyobozi bwa gisirikare (bita Command Staff) mu kigo cy’amahugurwa cya  Fort Leavenworth muri Kansas. Aya mahugurwa nayo ntiyayarangije kuko umutwe wa FPR Inkotanyi (umutwe wa Politike na gisirikare washnzwe n’impunzi z’Abatutsi muri Uganda)  FPR bivuga Front patriotique rwandais wari watangije intambara ku Rwanda Tariki ya 1 Ukwakira 1990.

Major Paul Kagame niwe wabaye umugaba mushya w’Inyeshyamba za FPR Inkotanyi

Akimenya ko Jenerali Majoro Fred Gisa Rwigyema watangije iyo ntambara yaguye ku rugamba,yahise ava muri  ayo mahugurwa shishi itabona asanga abandi ku rugamba. Urugamba rwatangiye ku ya 1 Ukwakira 1990 kandi izi nyeshyamba za Paul Kagame zatsinze urugamba ku ya  4 Nyakanga 1994 zifata ubutegetsi bwose mu Rwanda.

Jenerali Paul Kagame mu Mateka ya Zayire ubu yitwa Repubulika iharanira demukarasi ya Kongo

Uyu mu Jenerali Perezida Amateka azahora yibuka ko ari we wateye igihugu cya  Zaïre muri  1996 agakuraho Perezida Marechal  Mobutu Sese Seko muri 1997 mu ntambara yari ashyigikiwemo na  Uganda na Leta zunze ubumwe za Amerika. Iyi ntambara yamenetsemo amaraso atagira ingano y’Abazayirwa,Impunzi z’Abahutu b’Abanyarwanda bari barahunze  FPR Inkotanyi hamwe n’abasirikare bo ku mpande zose.

Marshall Mobutu Sese Seko

Uyu mu Jenerali Perezida Amateka azahora yibuka ko ari we wateye igihugu cya  Zaïre muri  1996 agakuraho Perezida Marechal  Mobutu Sese Seko muri 1997 mu ntambara yari ashyigikiwemo na  Uganda na Leta zunze ubumwe za Amerika. Iyi ntambara yamenetsemo amaraso atagira ingano y’Abazayirwa,Impunzi z’Abahutu b’Abanyarwanda bari barahunze  FPR Inkotanyi hamwe n’abasirikare bo ku mpande zose.

Perezida Laurent Desiré Kabila

Perezida Joseph Kabila

Nyuma yo gukuraho Mobutu wasimbuwe naLaurent-Désiré Kabila,Paul Kagame yarongeye atangiza intambara ya kabiri ya Kongo kuva 1998-2003  yo gukuraho na Laurent-Désiré Kabila.  Uyu amaze gupfa (arashwe n’umwe mu bamurindaga) agasimburwa n’umuhungu we  Joseph Kabila, Perezida Paul Kagame yakomeje gukoresha cyangwa/no gushyigikira imitwe ya kinyeshyamba yo gukuraho na Perezida Joseph Kabila. N’igihe uyu Joseph Kabila yari amaze gusimburwa na Perezida mushya bwana Felix-Antoine Tshisekedi binyuze mu matora, ubu muri 2024 isi yose ivuga ko Jenerali Paul Kagame perezida w’u Rwanda akoresha umutwe w’inyeshyamba witwa M23 (bivuga Mouvement du 23 Mars) umutwe w’Abanyekongo b’Abatutsi bavuga ikinyarwanda mu rwego rwo gukuraho nanone Perezida Felix-Antoine Tshisekedi. Perezida Paul Kagame yarwanye n’abaperezida bose ba Kongo  kuva mu mwaka wa 1996 kugeza ubu .

Perezida Félix-Antoine Tshisekedi

Twinjire mu buzima bwe bwite?

Paul Kagame ni umwana wa 6 akaba ari nawe bucura mu bana ba Deogratis na Asterie Rutagambwa.Paul Kagame yagiraga mukuru we umwe gusa witwa Joseph Rutagambwa, wishwe n’impanuka y’imodoka ari kumwe n’abandi barwanyi b’inyeshyamba za NRA igihe bari boherejwe kurwanira ahitwa Kasese mu mahuriro y’igice cy’iburengerazuba bwa Uganda. Yari afite ipeti rya JO1.

Astérie Rutagambwa,nyina wa Paul Kagame yavutse  mu mwaka wa  1931 apfa ku ya 22 Ugushyingo 2015 afite imyaka 84.

Joseph Rutagambwa umurwanyi mu nyeshyamba za Uganda  akaba mukuru wa Paul Kagame

Paul Kagame agira abashiki be (bose baramuruta). Umwe yitwa Mars Gracia Rutagambwa  undi ni  Mme  Béatrice Mukagaga, uwa gatatu yitwa  April Catherine Rutagambwa (bakunze kwita Kathy),uyu si mushiki we gusa ni n’incuti ye magara ntunsige. Hanyuma haza mushiki we wundi witwa Jeanne d’A rc Kayizirwe.

Aba ni bashiki ba Paul Kagame

Ubukwe bwa Paul Kagame na Jeannette Nyiramongi tariki ya 10/06/1989

Tariki ya  10 Kamena 1989, Paul Kagame wari ofisiye mu ngabo za Uganda ku ipeti rya Major, yashyingiranywe na Madamazera Jeannette Nyiramongi, nawe wari impunzi y’umunyarwanda wabaga i Nairobi muri  Kenya, ariko umuryango we ukaba wari warahungiye mu Burundi. Ubukwe bwabo 2bwabereye i Kampala muri Uganda.

Amakuru nahawe n’umusaza wari uhari avuga ko icyo gihe biyakiriye muri Sharing Hall ya Nsambya Kampala maze abashyitsi b’imena bagakomereza ibirori bya  after-party muri  Colline Hotel iherereye Mukono.

Nyuma gato y’ubukwe

Bwana Paul Kagame na Madamu Jeannette Nyiramongi babyaye abana bane,abahungu batatu n’umukobwa umwe. Abo ni Ivan Cymoro Kagame wavutse muri 1990 (akorera Leta mu Kigo cya RDB) Ange Kagame wavutse muri 1993 (yavukiye i Buruseli mu Bubiligi nawe akorera Leta muri perezidansi), Ian Kagame,na  Brian Cyizere Kagame (aba bombi nabo bakorera Leta,ni abasirikare bakuru mu ngabo z’u Rwanda).

Paul Kagame n’urugo rwe rwose muri iki gihe

Paul Kagame n’urugo rwe rwose muri iki gihe kongeraho umukwe we n’umwuzukuru we

Paul Kagame nta dini agira,ariko agira ifishi muri Kiliziya Gatulika

Bwana Paul Kagame ntakunda gusenga habe na buhoro, ariko si umuhakanamana,ni umukirisitu wo muri Kiliziya Gatulika kuva akivuka nk’uko ifishi ye ya batisimu ibigaragaza ariko rwose kujya mu misa kwe ni imbonekarimwe. Muri 2018 yumvikanye aciraho iteka amadini avuga ko akabije ubwinshi n’akajagari kandi ntacyo amaze gifatika.Muri uku kwezi Leta ayoboye yafunze za Kiliziya n’insengero zisaga 5000 kandi biracyakomeje. We avuga ko yizera ko Imana iriho ariko kandi ko nta cyo ugomba kuyigondozaho ufite amaboko n’amaguru ngo ukore wibesheho. Kagame kandi ntiyemera ko Imana imutumaho abandi, ahubwo avuga ko ariwe yagombye kwibwirira cyangwa akaba ari we ituma ku bandi (direct line).

II Ushobora kunkurikira ku rubuga rwa whatsapp  channel on WhatsApp: https://whatsapp.com/channel/0029VaCyM5ILdQejDYwQ2b2 II

Ese Paul Kagame,yaba ari umunyagitugu cyangwa ni perezida wihanganira abatavuga rumwe na we?

Igitugu(dictature) ni iki? Ni  ubutegetsi bwa politike  buba buri mu kiganza cy’umutegetsi umwe wica agakiza, cyangwa mu gatsiko gato cyane,aho inzego zose z’igihugu,zose zose zigendera ku mategeko ye, akaba hejuru y’amategeko wenyine, nta watinyuka kumubaza ngo urakora ibiki.

Iki gihugu cyitwa u Rwanda cyahuye n’ibyago byinshi n’ibikomere byinshi mu myaka magana cyamaze mu butegetsi bw’ingoma za cyami n’ingoma za ki Repubulika. Nanone iki gihugu cyahuye n’intambara y’iya 1 ukwakira 1990 intambara yasojwe n’umutwe wa FPR Inkotanyi yamaze imyaka ine maze mu mezi atatu yayo ya nyuma habamo jenoside yakorewe abatutsi, ubuhunzi bwa za miliyono, n’ubundi bwicanyi butagira izina.Ingaruka zabyo zose na n’ubu ntizirashira.

N’ubwo iki gihugu cyakubititse ariko abantu, cyane cyane abo mu bihugu by’iburengerazuba bw’isi hamwe na bamwe mu Banyarwanda bavuga ko Paul Kagame yazanye amahoro, ituze, umutekano n’ubukungu bugaragara mu Rwanda rwa nyuma y’intambara na jenoside yakorewe abatutsi. Nanone bamushimira kurwanya ruswa mu bategetsi ku buryo isi yose izi ko nta ruswa irangwa i Rwanda. Abagenzi bagenderera u Rwanda batangazwa n’isuku iharangwa,urugwiro bakiranywa n’abakozi b’inzego z’abinjira n’abasohoka,serivisi bahabwa zinoze, n’umutekano udadiye neza cyane ku manywa na nijoro mu gihugu hose.

ESE WARI UZI KO: Perezida Paul KAGAME amaze guhabwa imidali y’ishimwe n’ibikombe bigera kuri 26 byose kuva muri 2003 kugeza ubu muri 2024?

Ababibona ukundi ariko, harimo n’abamunenga,urugero nk’Imiryango Mpuzamahanga itegamiye kuri za Leta, nka Human Rights Watch na  Amnesty International, bavuga ko uyu mugabo ari umunyagitugu utubahiriza uburenganzira bw’ikiremwa muntu, utorohera abatavuga rumwe na we, utorohera itangazamakuru, kandi bakekaho kwiba amajwi mu matora nayo bavuga ko aba mu buryo butubahiriza amahame ya demukarasi.  Abarwanya ubutegetsi bwe bavuga ko ayoboza igihugu agatsiko gato k’abantu batihanganira na gato abatavuga rumwe na we. Bamunenga kandi guhindura itegeko nshinga kugira ngo azagume ubuziraherezo ku butegetsi aho ahabwa amajwi y’umurengera.

Ese yaba ari umugabo utavugirwamo cyangwa ahora yiteguye kuganira n’abamurwanya ?

Kuri icyo kibazo,Amateka yo muri iyi myaka 30 ishize yemeza ko perezida Paul Kagame ari umukuru w’igihugu utavugirwamo na gato kandi udatinya igihugu iyo ari cyo cyose. Igihe ubutabera bw’Ubufaransa bwashakaga gucira imanza abantu be mu idosiye yo guhanura indege ya perezida Juvénal Habyarimana muri 1994 yahise acana umubano n’icyo gihugu. Igihe perezida wa Tanzaniya Bwana Jakaya M. Kikwete yamugiraga inama yo gushyikirana n’abamurwanya harimo na FDLR, yamusubizanyije inani na rimwe ndetse amubwira ko niba ashaka kuvugira abo bantu (“abajenosideri” nk’uko abita ) nawe azamutegerereza ahantu hakwiriye akamukocora. Perezida Paul Kagame ariko yemera ko abahunze bose yewe n’abakoze byaha bya jenoside batahuka, abamurwanye bose bemerewe gutahuka bapfa kuba gusa bataje barwana,cyangwa bataje bashaka gukora politike yo guhatana nawe.Abasirikare banyuzwa mu ngando bakigishwa uko bazitwara babyemera bakaba amahoro. Ni umukuru w’igihugu udatinya kuvuga ko umuntu wese umurwanya (=urwanya igihugu) nta soni bimutera yo kumwikiza aho yaba ari hose. Ararahira akavuga ko utabikira.Ku by’umutekano na politike, nta miyaga ashyiramo.

II Ushobora kunkurikira ku rubuga rwa whatsapp  channel on WhatsApp: https://whatsapp.com/channel/0029VaCyM5ILdQejDYwQ2b2 II

Repubulika y’u Rwanda mu mafoto,irebere ubwiza bw’iki gihugu gito cyane cyo mu Muryango wa EAC kidakora ku nyanja ariko kihagazeho mu ruhando rw’amahanga

Uyu munsi ku cyumweru tariki ya 11 Kanama ni bwo Perezida Paul Kagame ari kurahirira kuyobora u Rwanda muri manda y’imyaka ya kane,mu birori biri kubera kuri Stade Amahoro i Remera.Ni nyuma yo gutsinda amatora y’Umukuru w’Igihugu yabaye ku wa 15 Nyakanga n’amajwi 99.18%.

Abakuru b’ibihugu bagera 20 bahageze, ariko ntibarimo ab’ibihugu bya rutura ku isi nk’Uburusiya, Ubushinwa, Ubwongereza,Leta zunze ubumwe za Amerika,Ubumwe bw’Uburayi, Ububiligi, Ubufaransa, n’ibindi

Mu bihugu by’ibituranyi, ba perezida Félix Antoine Tshisekedi wa Repubulika Iharanira Demokarasi ya Congo,Evariste Ndayishimiye w’u Burundi,na Yoweli Kaguta Museveni ntibahari, Museveni ariko we yohereje intumwa yo kumuhagararira, ariko abo babiri ba mbere bo nta n’inyoni irava iwabo iza muri ibi birori.

IYI SI,

Komeza gukurikira uru rubuga rwigisha uzamenya byinshi ukeneye mu buzima bwa buri munsi.
Dukurikire ku rubuga rushya rwa Whatsapp IYI SI  https://whatsapp.com/channel/0029VaCyM5ILdQejDYwQ2b2u
Dukurikire kuri Youtube kuri IYI SI talk Show https://youtu.be/NbOmqOTZ6yE
Injira muri groupe facebook https://www.facebook.com/groups/565816492326178/?ref=share

_{HAKIZIMANA MAURICE} 

Nkurikira ku rubuga rwa Whatsapp https://whatsapp.com/channel/0029VaCyM5ILdQejDYwQ2b2u