Hari ikibazo mfite: Bagore beza,Bakobwa beza, nta kindi kintu kindi mufite mwaha abagabo n’abasore bazi ubwenge kitari igitsina?

December 25, 2023

Abarebye: 21,189

Reka tuvuge ibintu uko biri : Bagore beza,Bakobwa beza, nta kindi kintu kindi mufite mwaha abagabo n’abasore bazi ubwenge kandi bafite gahunda kitari igitsina? Hari abagore n’abakobwa benshi bitotombera ko hari abagabo n’abasore benshi babasaba “ku bintu” maze babibima bakabivamo ako kanya. Ku bw’ibyo,bakagera ku mwanzuro w’uko bagomba kwemera guhindurwa ibikinisho byo gushimisha abagabo mu by’igitsina, ngo kugira ngo hato batabacika.

REKA TUBIVUGEHO! Nta kindi kintu cyatuma umukunzi wawe agukunda kitari muri izo nzira z’igitsina? Ishakemo ikindi kintu cy’agaciro kurushaho mwashyira ku meza mu rukundo. Ngaho mutubwire!

Kuki iyo mwimye abakunzi banyu ku bintu, bahita bigendera? Ni cyo kintu cyonyine gusa baba babashakaho? Ni cyo cyonyine baba bababonaho? Nta kindi kintu baba bababonaho bahomba mutandukanye?

Reka rero mbahe igitekerezo gikomeye:

Mukure igitsina mu rukundo maze turebe icyo (abenshi) mu bakobwa/bagore muraba musigaranye cyo kuzana mu rukundo. Mugerageze mushake ibindi mwatanga.Ntibihari se?

Uretse igitsina,wari uzi ko hari ibindi bintu waha umugabo cyangwa umusore mukundana by’ukuri? None se ntuzi ko hari byinshi wamuha, haba mu buryo bufatika, mu buryo bw’ibitekerezo bizima, mu buryo bw’umwuka, mu buryo bw’ibyiyumvo? Mu nkunga akeneye? Nta mushinga wamushushanyiriza? Nta shoramali mu kintu?

// Nkurikira no kuri whatsapp : channel on WhatsApp: https://whatsapp.com/channel/0029VaCyM5ILdQejDYwQ2b2//

Nk’uko mpora mbibabwira, urugo,urukundo, n’ubucuti ni iby’abantu babiri. Ni mpa nguhe, buri wese akagira icyo akura mu rukundo. Ngaho mumbwire, uretse kurisha igitsina,ni iki usigaranye waha uwo musore, uwo mugabo mukundana?

Bagore beza, nkumi nziza, mukunze(abenshi) guhora musaba kandi muhabwa amafaranga yo kugura amasakoshi meza, udukweto twiza, imyenda myiza, za telefoni zigezweho,gusohokana no kuryoshya, ndetse bamwe no guhaha….byose ni amafaranga ukongeraho amafaranga n’andi mafaranga! Mbese umusore,umugabo ni uwo kuguha gusa gusa. Birakwiriye? None we uramuha iki mu rukundo? Ni iki kindi ufite cyo kuzana kitari umubiri? Kitari igitsina?

Muri make, ni iki kindi ufite wazana ku meza?

Dore rero icyo nakubwira, gerageza kuba wa mukobwa,wa mugore w’agaciro, ku buryo umukunzi wawe agira ubwoba bwo kugutakaza. Kora ku buryo uba umugore n’umukobwa umukunzi wawe yumva atasimbuza undi mugore! Fatisha umugabo,umusore ibindi bintu bitari igitsina,kora ku buryo umwubaka aho gushaka uwamaze kwiyubaka mu gihe wowe utubakitse haba mu bwenge,mu mutwe,haba mu bitekerezo haba mu bukungu haba mu bumenyi. Wibitseho iki kindi?

Bantu banjye, mwikuremo kwigira ibikinisho byo guhaza irari ry’abagabo gusa,cyangwa ngo mwumve ko igitsina(n’ibikigaragiye) ari imari mugendana. Ntimukarishe gusa ikimero cyiza, amabere yuzuye igituza, ikibuno cyubakitse(nyash), cyangwa gutereka amaso. Igitsina siyo mari (yonyine) yubaka urukundo cyangwa urugo. Mushakire ahandi kandi muhabone.

Umubano ushingiye gusa kuri ndagusaba amafaranga unsabe igitsina nturamba. Ubu noneho urumva impamvu umwima kandi we aguha amafaranga ye agahita abivamo. Ni ukubera ko nta rukundo rutunguka rubaho. Urwanyu rero niba rwubakiye gusa ku mufuka no mu ikariso, ubwo buri wese agomba gukora ku buryo agera ku cyo ashaka, agahaza irari rye (irari ry’amafaranga ku ruhande rumwe, irari ry’igitsina ku rundi). Numwima rero ku bintu, azumva ahemukiwe kuko nta kindi n’ubundi yari agutegerejeho,nta kindi abona ufite wamuha usibye ibyo bintu nyine. Azakureka kandi birumvikana.Sibyo? Reka noneho duhindukize indorerwamo: uwo mugabo cyangwa umusore mukundana aramutse akupye kuguha ku ifaranga rye akakwima n’urupfumuye,wowe uzamugumaho?