Dukurikije Bibiliya,Abagore ntibagomba kwigisha mu iteraniro

HAKIZIMANA Maurice

Muri iki gihe amadini ari kurushanwa kugira Abashumbakazi (ba pasiteri), AbaBishopukazi (ba Musenyeri), Abarimukazi (Abigisha),n’Intumwakazi (ba Apostles).Ndetse numvise amakuru avuga ko na Kiliziya Gatulika itazatangwa,nayo ngo ishobora (?) gukora nk’abandi.Biracyigwaho.

Ni iki Bibiliya ibivugaho?

Mu rugo rw’abakristo Umugore ntaringaniye n’umugabo

Umugabo ni Umutware Imana yamuhaye (1 Kor.11:3). Agomba kumwumvira nka Shebuja (Lord).

• Namwe bagore ni uko mugandukire abagabo banyu, kugira ngo nubwo abagabo bamwe batumvira ijambo ry’Imana bareshywe n’ingeso nziza z’abagore babo, nubwo baba ari nta jambo bavuze (1Petero 3:1)

Imana ntiyemerera Umugore kwigisha mu iteraniro ririmo abagabo.Ahubwo aceceke rwose. Atege amatwi.(1Tim.2:11,12,13-14)

• Umugore yige acecetse kandi aganduke rwose. Sinemerera umugore kwigisha cyangwa gutegeka umugabo,ahubwo aceceke,kuko Adamu ari we waremwe mbere, Eva akaremwa nyuma.Nanone, Adamu si we washutswe,ahubwo umugore ni we washutswe rwose maze aracumura.Icyakora, azarindwa binyuze mu kubyara abana,niba akomeza kugira ukwizera n’urukundo no kwezwa hamwe no gushyira mu gaciro.(1Tim.2:11-14)

Umugore ntiyemerewe guhanura,gusenga,no kuvugira mu iteraniro mu ijwi riranguruye. Ahubwo aceceke.Nashaka kugira icyo abaza, abarize umugabo we (k’umufite) mu rugo. Bibiliya ivuga ko “biteye isoni ko umugore avugira mu iteraniro”. (1Kor.14:26-35)

• Kuko Imana atari iy’akaduruvayo,ahubwo ni iy’amahoro.Nk’uko bimeze mu matorero yose y’abera,abagore bacecekere mu matorero kuko batemererwa kuvuga, ahubwo baganduke nk’uko Amategeko na yo abivuga. Niba rero hari ikintu bashaka kumenya, bajye bakibariza abagabo babo mu rugo, kuko biteye isoni ko umugore avugira mu itorero. (1Kor.14:33-35)

Bibiliya ivuga kandi ko Abepisikopi n’Abadiyakoni bose bagomba kuba ari “abagabo”.Ntaho Bibiliya ivuga umwepisikopi w’umugore!(1 Tim.3:1-13)

• Iri jambo ni iryo kwizerwa ngo “Umuntu nashaka kuba umwepisikopi, aba yifuje umurimo mwiza.”Nuko umwepisikopi akwiriye kuba inyangamugayo, no kuba umugabo w’umugore umwe, abe udakunda ibisindisha wirinda, ugira gahunda mu kubaho kwe, ukunda gucumbikira abashyitsi, ufite ubwenge bwo kwigisha (1Timoteyo3:1-2)

Ese wari uzi ko nta ntumwa n’imwe yari Umugore? Nta mugenzuzi (épiskopoï),umukuru w’itorero (présbutéroï) cyangwa umufasha wabo (diakonoï) w’umugore (diakonissa) wabagaho. Ahubwo bagombaga kugira “abagore” n’abana bitwara neza.(Tito 1:5-9)

• Ibyo ni ukuvuga abagabo batariho umugayo bafite umugore umwe, bafite abana bizera kandi bataregwa ko ari inkubaganyi cyangwa ibigande. (Tito 1:6)

Dukurikije bibiliya,niba umugore ageze hanze y’iteraniro,noneho aba yemerewe kuhavugira.Niba kandi atari iwe mu rugo cyangwa umugabo adahari, noneho yakwigisha abamusanze cyangwa abo asanze.Kuvuga ubutumwa hanze y’itorero,kwigisha abana be ijambo ry’Imana ntibinyuranya n’iyo mirongo ya Bibiliya.

• Umwami Imana yatanze itegeko, Abagore bamamaza inkuru baba benshi.(Zaburi 68:11 cyangwa uwa 12 muri Bibiliya Yera)

Ikibazo : Amadini avuga ko ari ay’Abakiristo avana he ibyo kwimika Abashumba, Abasenyeri, Abakuru b’amatorero b’Abagore? Ese ni ukugira ngo ahuze n’ibyo Abanyepolitike bifuza? Gira icyo ubivugaho!

Mukomeze kugira ibihe byiza!

IYI SI,
Komeza gukurikira uru rubuga rwigisha uzamenya byinshi ukeneye mu buzima bwa buri munsi.
Dukurikire ku rubuga rushya rwa Whatsapp IYI SI  https://whatsapp.com/channel/0029VaCyM5ILdQejDYwQ2b2u
Dukurikire kuri Youtube kuri IYI SI talk Show https://youtu.be/NbOmqOTZ6yE
Injira muri groupe facebook https://www.facebook.com/groups/565816492326178/?ref=share
Injira muri groupe WhatsApp https://chat.whatsapp.com/CIc4qkwAzWz2Fa0F68JBGk

_{HAKIZIMANA MAURICE}