MBEGA UBURYARYA BW’ABA “BIZERA”:NTIBIZERA IBYO “BIZERA”

March 17, 2023

Abarebye: 10,707

Hakizimana Maurice

Iyi nkuru ngiye kukubwira yanyumije neza neza,burya bwose barya bihayimana barya baseenzi ba cyane,barya “bizera” ntibizera ibyo bizera!!!

[Mu mugi umwe hariya muri Leta zunze ubumwe za Amerika,hari umugabo washatse gufungura akabari (bar) gateganye n’urusengero (église).Yatangiye kubaka!

Abizera bo muri urwo rusengero barangajwe imbere n’abihayimana (abihaye Imana) bararakaye cyane ngo ntibashaka akabari gateganye n’urusengero rwabo,nuko batangira gusa nk’abigaragambya ngo Akarere gahagarike uwo mushinga,biranga.

Biyemeza kubisengera.

Abaseenzi ba cyane biyiriza ubusa batakambira Imana ngo iburizemo uwo mushinga w’akabari.

Ariko biranga,imirimo irakomeza,igera ku musozo.

Igihe cyo kwitegura gufungura akabari kigeze, ariko nyine nyirako ahanganye bikomeye n’abo “bizera”,haguye imvura nyinshi inkuba ikubita ka kabari gahinduka ivu neza neza.Hari ku manywa y’ihangu.

Abakirisitu nako “abizera” baranezerwa barabyina bashimira Imana ko yumvise amasengesho yabo igakubitisha inkuba akabari kari kagiye kuba hafi y’amarembo yabo!

Baranezerewe ku buryo nyirakabari byamurakaje akajya kubarega mu rukiko,

asaba urukiko kubategeka kumuha indishyi z’akababaro za miliyoni ebyiri z’amadolari (miliyari ebyiri z’amanyarwanda) kuko biyemereye ko ari amasengesho yabo yakubitishije inkuba inyubako ye!!

Mu kirego cye,yavuze ko iyo nkuba yatewe n’amasengesho yabo, ko bamureze ku Mana bakayimuteranyaho kandi nta ribi rye!

Yagize ati :

¶”Iyi nkuba nibo bayinteje mu buryo buziguye! Bajyanye ubugambo bwabo ku Mana,kubera ko bahora hafi yayo,bayinteranyaho,kuko njye ntanaheruka kuyivugisha!!”(ntaheruka mu rusengero)!

Mu rukiko ba bihayimana n’urusengero rwose baritabye urukiko rurakubita ruruzura!

Urwo rusengero n’aba baseenzi barwo bose baburanye bahakana icyaha,bavuga ko nta ruhare na ruto babigizemo, banavuga ko amasengesho yabo atari yo yamanuye inkuba yashije ako kabari.

Abo “bizera”, mu rukiko bakoresheje inyandiko y’ubuhakanyi(atheism) yiswe iy’ubushakashatsi bwa Benson, yo muri kaminuza ya Harvard, inyandiko yemeza ko nta Mana ibaho kandi ko:

“Amasengesho abantu birirwamo basaba Imana ari imfabusa kuko nta kintu na gito yigeze amara” ( mu gifaransa:”La prière d’intercession n’a eu aucun impact !)!

Urukiko rumaze kwiherera no gusoma inyandiko zose z’ababuranyi,rwagarutse gutanga umwanzuro warwo utangaje! Perezida w’urukiko yagize ati:

“Uru rubanza turarusubitse kuko twaruburiye umwanzuro,kuko hano haraburanywa ku masengesho aho nyir’akabari utanasenga rwose we yemera imbaraga z’amasengesho cyane, mu gihe aba bizeera,aba bihayimana,aba baseenzi n’abakirisitu babo bose birirwa mu masengesho bo bari guhakana bagaramye imbaraga z’amasengesho yabo.”]

Wowe ubibona ute? Ese wemera ko “abizera” bizera koko ibyo bizera ?

Reka mbareke mubitekerezeho mwitonze, mutubwire uko mubibona!!

Akagoroba keza

Profeseri Hakizimana Maurice ni umwarimu w’umwuga warangije icyiciro gihanitse(masters Meef) mu burezi muri Université Catholique de Paris no mu bumenyamuntu muri Sorbonne Université,akaba yigisha amashuri makuru mu Bufaransa.Wamukurikira kandi kuri : Facebook,Twitter na Instagram