MU MADINI

Ese mwe mubona “amadini” yo muri iyi si hari icyo afashaho ikiremwamuntu cyane?

March 14, 2023
professormaurice
272 Comments
Abarebye: 2,133

Hakizimana Maurice

Mvuze “cyane” kuko nzi neza ko nta kitagira umumaro:amadini menshi yubatse amashuri turiga (njye amashuri yanjye [hafi ya yose] nayize mu bigo bya Kiliziya: Collège St André, Lycée St.Alexandre Saul,G.S.St Jean Baptiste De La Salle,na Université Catholique de Paris)!

Sinakwirengagiza nanone ibigo Nderabuzima, Ibigo Mbonezamirire, Ibitaro,n’ibindi bikorwa by’Amadini,cyangwa biterwa inkunga n’amadini!

Ariko kandi,ikibazo cyanjye gifite ishingiro: amadini avuga ko ari inzira ziyobora ku Mana[Iyoboka-Mana]kandi mu NYIGISHO zayo akenshi yibanda ku rukundo, ubworoherane, kubana neza mu miryango, imyitwarire izira amakemwa,kuvugisha ukuri, kuba inyangamugayo,kutica,n’andi mahame meza cyane!

NB:Nafunze amaso ku nyigisho z’IBINYOMA zimwe na zimwe zifitanye isano n’IMYIZERERE cyangwa IMYEMERERE y’amadini zinatuma aba menshi kandi ntiyumvikane ku tuntu tumwe na tumwe! Nibanze ku NYIGISHO NZIZA amadini yose yigisha zagombye kuba zarahinduye isi!!

None nyuma y’imyaka ibarirwa mu bihumbi byinshi amadini y’iyi si YIGISHA ibintu byiza gusa gusa,umusaruro[ BILAN] ni uwuhe?

AMADINI Y’IKINYOMA: IKIYOBYABWENGE CY’IKIREMWAMUNTU (“L’OPIUM DU PEUPLE”)

Karl Marx,umuhanga mu bya filozofiya wabayeho kuva mu wa 1818 kugeza 1883 azwiho kuba yaravuze ngo “IDINI,ni ikiyobyabwenge (urumogi) cy’ikiremwamuntu”!

Mbere ye habanje abandi bahanga ari nabo yafatiragaho,nk’uwitwa Emmanuel Kant wari waravuze ko abona idini nk’urumogi,aho yanditse mu gitabo nasomye kitwa “La Religion dans les limites de la simple raison” aho dusoma ngo:”idini risinziriza abantu,aho mu bwiyorobetsi bwinshi umukuru w’idini(yanditse umu prêtre) akubwira inkuru ziryoshye z’ubuzima bwa nyuma yo gupfa,akaguherekeza ugiye gupfa,ugapfa utujeeee,umeze nk’uri mu munyenga”!

Karl Marx we yavugaga ko “idini ariryo risinziriza abantu ntibamenye ubusumbane n’akarengane biba mu bantu,kandi ko rituma abanyagitugu(prolétariat) babakandamiza bitagoranye,aho idini ribatoza kwihanganira akarengane,ribatoza kuba abana beza,no kunyurwa n’ubuzima bubi bugoranye babamo nta kwitotomba,gukunda ubukene,no kudaharanira gukira”!

Kuvuga ko idini ari “ikiyobyabwenge” byafashwe mu buryo bw’uko ritera mu bantu “ikinya”! (Mu gitabo Critique de la philosophie du droit de Hegel).

NYUMA Y’IMYAKA MYINSHI CYANE,AMADINI Y’IYI SI YAGEZE KU KI(BILAN)?

Ndibutsa abankurikiye ko amadini adashinzwe kubaka amashuri n’amavuriro,ko ubusanzwe ibyo ari ibikorwa bya za Leta z’iyi si!

Urugero: Ese umubyeyi w’umukire agusigiye umutungo utagira ingano, akagusigira abana be ngo uzabiteho,ubahe ibyo kurya,ibyo kunywa,kwambara,ubavuze nibarwara,kandi ubakorere kimwe cyose mu mwanya we,ko nava mu ruzinduko yagiyemo azakugororera cyane,wakora iki?

Tekereza rero asanze barishwe n’inzara, amavunja,imyenda yarabacikiyeho, kandi bararembye ntubavuze ariko wowe ukamuratira INYUBAKO NZIZA wabubakiyemo, AMATUNGO menshi wamwororeye,hamwe n’IBIMODOKA byiza wamuguriyemo,kandi ko utigeze uhomba,cyangwa uhombya UMUTUNGO we ko ahubwo WIKUBYE KANE!

Ese yaguhemba? Yakugororera?

Igisubizo kirumvikana!! ABANA be nibo yagusabye kwitaho mbere ya byose)!

Mu buryo nk’ubwo,njye mbona amadini yaritaye ku NYUBAKO z’amashuri,n’amavuriro, akigira mu BUCURUZI bw’amahoteli,amashuri, amavuriro, n’ibindi,AKUNGUKA cyane,akagura IBIMODOKA n’ibindi,ariko ko yirengagije ubutumwa avuga ko yahawe: KWIGISHA ABANTU INZIRA IKWIRIYE!(Gereranya icyo gitekerezo na Matayo 24:45-47)!

ABANYAMADINI CYANE SIBO NYANGAMUGAYO CYANE!

White wooden signpost with four arrows – “honesty”, “ethics”, “respect”, “integrity”.

Nawe se,ushobora kunsobanurira gute ukuntu mu gihugu nk’Ubwongereza kiganjemo “Kiliziya y’ABANGILIKANI”(ntibisobanura “kwangirika” ahubwo biva ku ijambo ry’icyongereza ANGLICAN~ENGLAND~ENGLISH , bivuga Kiliziya y’abongereza, CHURCH OF ENGLAND)! Ni idini rikomeye cyane kuko ribarirwa abakiliya,ooh,ndibeshye, “abayoboke” bagera kuri miliyoni 85.

Ni idini ryiza cyane: ryigisha urukundo, ubworoherane, kandi ryemera ko Bibiliya ariyo muyobozi w’ikirenga waryo!

Nyamara ibyaha bikorerwa mu Bwongereza no mu bihugu byiganjemo iryo dini “ryiza cyane”,ni agahomanunwa:mwese muzi ikintu cyitwa UBUTINGANYI!

Raporo zigaragaza ko mu Bwongereza ibyaha biri hejuru cyane, aho byiganjemo: ubwicanyi, ibyaha byerekeye igitsina,gusambanya utwana tw’uduhungu cyane cyane,gushimuta abana,…..Kandi byose bigakorwa n’ABANGILIKANI 💯% Kiliziya iyoborwa n’Umwamikazi Elisabeth II.

Kiliziya Gatulika(ari nayo mubyeyi nyina w’amadini n’utudini twose twiyita “Abakristo”):

Yo ubwayo yivugaho ko yashinzwe mu kinyejana cya mbere, kandi ko ikomoka ku ntumwa,ku itorero ry’abakristo ba mbere (Christianisme primitif)!

Rifite abayoboke miliyari 1 na miliyoni 329,ikaba yigisha URUKUNDO mu isi yose!

Bibiliya Ntagatifu isomwa buri munsi mu misa, kandi bagira Ubuyobozi bikomeye buva ahantu hamwe: ku mugabo bita NYIRUBUTUNGANE! (Nyirabwo) Papa (pope) perezida wa Leta ya Vatican umurwa mukuru wa Kiliziya Gatulika Ku isi hose!

Ariko iyi Kiliziya ifite amateka mu bwicanyi ndengakamere bwabaye mu isi,uhereye kubwo yo ubwayo yikoreye(INQUISITION),ukagera ku bwo yashyigikiye cyangwa yahagarikiye!

Hagati ya 1095 na 1270 intambara ziswe Les Croisades/Crusades(Abanyamisaraba) aho ingabo z’Abazungu bo mu Burengerazuba (Occident) bishe imbaga itagira ingano mu ntambara zo kubohoza aho bita “Ahera”,aho bavuga ko hari”imva” ya Kiristu i Yeruzalemu!

Barwanye inkundura n’ABAYISILAMU nabo bambariye urugamba! Ayo madini yombi niyo yikoreye amaraso yose yamenetse aho hantu icyo gihe! Nta wabihaniwe!!

Kiliziya ishinjwa Kandi amaraso yose yamenetse mu ntambara ebyiri z’isi(miliyoni 9 mu ya mbere na miliyoni 85 mu ya 2 y’isi) kuko hafi ya zose zarwaniwe mu bihugu bya Kiliziya Gatulika i Burayi.

Jenoside mu Rwanda ntiyari kuba iyo Kiliziya iyibuza kuko abishwe n’ababishe bari abakiristo kuko ibarura ryari ryarabaye imyaka 3 mbere y’iraswa ry’indege, ryagaragaje ko 90% by’abanyarwanda bari abakiristo cyane,(62% by’abagatolika, 18% by’abaporoso, na 8% by’abadiventi)!

Ayo madini yose wayasanga mu bakatiwe burundu y’umwihariko n’ibindi bihano ku bishe inzirakarengane, kandi ubaruye abishwe wasanga ari abakiristo bagenzi babo,ndetse n’ababigishaga urukundo!!

Abakiristu barimbagura abandi bakirisitu kandi ku cyumweru no ku isabato bari bahanye “amahoro ya Kiristu” cyangwa bize kubaha Imana no gukundana!

Birumvikana ko abicanyi bose batahanwe,kandi n’abiciwe bose ntibahawe ubutabera!

Hano mu Bufaransa,Kiliziya Gatulika iregwa gukingira ikibaba abihayimana bayo mu madosiye ibihumbi magana abiri na cumi na bitandatu(216.000) y’ibyaha byo kwangiza utwana tw’abahungu kuva mu mwaka wa 1950 kugeza 2021.Haravugwa ko hari andi madosiye ku buryo azagera ku bihumbi 300.000!

Ibaze amadosiye yo mu bihugu byose, uyakurikiranye yose Kiliziya yarara ihirimye!!

ISILAMU: ni idini “ryiza cyane” kuko iryo jambo Islam ubwaryo(icyarabu) risobanura “UKUGANDUKA”(la soumission)! Ni ukuvuga kugandukira Imana!

Igitabo gitagatifu cyabo,KOROWANI(Coran) bavuga ko bagihawe n’Imana(Allah mu cyarabu),aho yabonekeye uwo bita Intumwa y’Imana Muhamadi(Mahomet) mu kinyejana cya 12 muri Arabiya Sawudite!

Abayisilamu(Musulmans/Muslims) bagendera ku nkingi nziza cyane za mwamba,inkuru muri zo zikaba eshanu nk’uko bivugwa muri hadith: “Islamu yubatse ku nkingi eshanu za mwamba”! (arizo Chahada,Salat, Saoum, Zakat, na Hajj)!

Ntiriwe njya mu bice byavutse kuri Islam y’umwimerere nk’aba Sunites ari nabo 90% by’aba Islam bose ku isi,cyangwa aba Shiites(10%),cyangwa ngo njye mu mpaka z’imyemerere,iri dini ryigisha “urukundo,ubuvandimwe n’ubwubahamana”!!

Ariko kandi, iri dini ryiza cyane riregwa kumena amaraso atagira ingano mu isi:Miliyoni 670 z’abantu batari abayisilamu bishwe n’abayisilamu kuva yavuka,kandi imibare ikomeje kwiyongera!Vuba aha muri Siriya ubwicanyi bwakozwe na Islamu bwahitanye abaturage bari hagati ya 400.000 na 480.000!

••• Hari n’abadatinya kwita Islamu,idini ry’ibyihebe,n’iterabwoba!•••

Hari ibyitwa Inquisition espagnole(kwica ataravugaga rumwe na Islam muri Esipanye) byamaze imyaka 350 hagati ya 1478 na 1834 aho Islam yashakaga gushinga za Leta zayo mu Burayi kuva Esipanye kugera mu Bufaransa!

Islam iregwa gucuruza abacakara birabura bagera kuri miliyoni 14 bagurishijwe na za Leta zayo muri Afurika y’amajyaruguru (Maghreb/Abarabu)!

Mwibuke ko abagurishwaga babaga ari abarokotse kuko miliyoni 25 z’abacakara bagurishijwe ku isi,hari miliyoni 120 zapfuye zitaragera ku isoko! Abakiristu bishwe na Islam babarirwa muri miliyoni 50 mu ntambara ntagatifu!

NB: Nibanze ku madini akomeye ari nayo afite imbaga nyamwinshi mu isi!!

Sinirengagije andi madini mato mato nayo yigisha URUKUNDO mu magambo,akaririmba neza cyane,ariko washaka icyo yafashijeho isi GIFATIKA ukakibura!

BIBILIYA NA KOROWANI BIRARENGANA!

Korowani igira iti:

“Nta n’umwe muri mwe wemera bya nyabyo niba adakunda umuvandimwe we nk’uko yikunda”(hadith~Imam Boukhari)

Irongera iti :

“Abemera bose ni abavandimwe”(sourate ya 49,verset 10)!

Bibiliya irahebuje! Igira iti:

“Ibyo mwifuza ko abantu babagirira byose,namwe mube ari byo mubagirira”(Matayo 7:12)!

Ikongera iti:

“Ndabaha itegeko rishya ngo mukundane nk’uko nabakunze,mube ariko namwe mukundana”(Yohana 13:34)!

Ikibazo ni iki: Ese koko AMADINI yigishije urukundo uko bikwiriye?

¶ Yunze abatuye isi?

¶ Yabujije intambara?

¶Ubwayo se yunze Ubumwe aroroherana?

¶Nta matiku ayarangwamo?

¶Abuza akarengane?

¶Abizera n’Abemera kimwe n’Abagandukiramana barangwa n’urukundo?

¶Bafite imiryango ibana neza?

¶Abana babo bahabwa uburere bukwiriye?

¶Ese ni inyangamugayo?

¶Ni abo kwizerwa muri byinshi?ABANYEDINI CYANE SIBO NYANGAMUGAYO CYANE

Urugero: ntibiba ku kazi,ntibakopera ku ishuri,kandi ntibakorera ijisho?

Ndasoza iyi nyandiko yanjye nshimira abantu mwese(amadini murimo yose) mugerageza kuba inyangamugayo hagati y’abantu bangiritse mu by’umuco,kandi mukabitoza abana banyu!

Ndanashimira Abakristo b’ukuri (n’ubwo ari bake mu isi) bagerageza kuba abizerwa, bagaharanira amahoro,kandi bakaba inyangamugayo n’indahemuka haba mu ngo zabo,mu kazi kabo,no mu buzima busanzwe bwa buri munsi!

Bibiliya mukunda igira iti:

“Twiringiye ko dufite umutimanama uzira uburiganya,Kandi twifuza kuba inyangamugayo muri byose”(Abaheburayo 13:18)!

Umwanzuro:

Simbona icyo gushinja ibyanditswe byera,kuko ubwabyo,iyo ubisomye usangamo amahame meza cyane mbwirizamuco,kandi aramutse akurikijwe nk’uko yigishwa, isi yose yaba Paradizo!! Nta ntambara,nta bushyamirane,nta bwicanyi,nta jenoside!

Mbona amadini muri rusange ntacyo yamariye isi GIFATIKA! Icyakora, yahindutse nka za Leta z’isi aho yashinze ubwami mu isi,akimika abayobozi batanyeganyezwa(the clergy)kandi akivanga cyane muri politike z’umwanda z’iyi si,mu ntambara zimena amaraso,no mu byaha by’ubwiyandarike ndengakamere (ubutinganyi,guhohotera abana)n’ibindi!

Amadini kandi yabaye imiryango y’ubucuruzi aho afite imari nini cyane akura mu buhinzi, ubworozi,amashuri, amavuriro,amahoteli n’andi mashoramali yanduye akorana n’abatware b’iyi si.

Aya madini Y’IKINYOMA yose akwiriye kuvaho kuko yangije byinshi kuruta ibyo yafashije!

Wowe ubibona gute?🎤🎤🎤🎤

Profeseri Hakizimana Maurice ni umwarimu w’umwuga warangije icyiciro gihanitse(masters Meef) mu burezi muri Université Catholique de Paris no mu bumenyamuntu muri Sorbonne Université,akaba yigisha amashuri makuru mu Bufaransa.Wamukurikira kandi kuri : Facebook,Twitter na Instagram

Intambara z’amadini zarabiciye biracika

272 thoughts on “Ese mwe mubona “amadini” yo muri iyi si hari icyo afashaho ikiremwamuntu cyane?”

Leave a Reply

Your email address will not be published. Required fields are marked *