IYI SI-AMAKURU YO MU ISI UBUMENYI BWA SIYANSI N'IKORANABUHANGA

Pasiporo na viza bitandukaniye he ?

April 17, 2023

Abarebye: 18,715

Gutembera mu bihugu byinshi hasabwa ko ugira agatabo kitwa pasiporo hamwe n’uruhushya rwo kubyinjiramo rwitwa viza. Kuki se pasiporo iba idahagije gusa ngo wizengurukire isi yose? Ese ubundi pasiporo na viza bitandukaniye he? Reka mbigusobanurire.

II Kunkurikira kuri Whatsapp https://whatsapp.com/channel/0029VaCyM5ILdQejDYwQ2b2u II Kunkurikira kuri facebook: https://www.facebook.com/professormaurice/.

Viza ni iki?

Viza ni uruhushya uhabwa n’igihugu ushaka kwinjiramo mbere y’uko uhaguruka iwanyu. Uyihabwa n’umukozi w’urwego rw’abinjira n’abasohoka. Urwo ruhushya (viza) ushobora kuruhabwa cyangwa ukarwimwa bitewe n’uko utujuje ibisabwa abarusaba (dore urutonde rw’ibyo bagusaba,kanda hano) .

Muri iyo viza haba harimo amakuru yawe yose ku buryo iyo uyisabwe mu igenzura bahita babona amakuru yose akwerekeye. Muri ayo makuru harimo amazina yawe yombi,igihe uzamara mu gihugu winjiyemo, aho wemerewe kujya,incuro umaze kujya muri icyo gihugu,n’impamvu zikugenza (kwiga,gutembera,ubukerarugendo,kwivuza,gukora,gutura burundu,gusura incuti…).

Pasiporo ni iki?

Pasiporo bakunze kuyita “urwandiko rw’inzira”.Ni agatabo uhabwa n’igihugu cyawe bwite ukakagendana aho ugiye hose mu bihugu by’amahanga.Ntiwakwemererwa kwinjira mu bihugu byinshi udafite ako gatabo,kuko na viza baguha yomekwa cyangwa igaterwa muri ako gatabo.

Burya pasiporo zirarutanwa: hari iza rubanda rwa giseseka(abaturage) zigenzurwa cyane ugatinda ku murongo,hakaba iz’abanyacyubahiro (abategetsi) zitwa pasiporo z’aba dipolomates babona bakagufasha kwihuta rwose.

Muri iki gihe cy’ikoranabuhanga,pasiporo hafi ya zose ku isi zikubiyemo amakuru menshi cyane atarajyaga mu za kera,kuko ashyirwamo amabanga adasomwa n’ubonetse wese mu buryo bwitwa biométrique(cyangwa digital). Ayo makuru akubiyemo ibikumwe bya nyirayo,cyangwa ndetse rimwe na rimwe n’imboni z’amaso yabo. Ibyo bituma bitorohera abazitizanya kuko gusa benda gusa kandi n’abazicuramo izitari zo bikabagora.

Muri pasiporo naho habamo amakuru arambuye ya nyirayo:amazina,imyaka y’amavuko, ubwenegihugu, umukono wa nyirayo,isura ye,ifoto ye n’ibimuranga,igihe itangiwe,igihe agaciro kayo kazarangirira, n’ibindi. Ahenshi(nka hano mu Bufaransa) pasiporo imara imyaka icumi yongerwa ubuziraherezo.

Ese nkeneye pasiporo irimo viza aho ngiye hose mu mahanga?

Muri rusange ukeneye pasiporo hamwe n’uruhushya rwo kwinjira mu gihugu ugiyemo ari rwo rwitwa viza.Uzirikane ko byombi bidasa kandi bidakora akazi kamwe: pasiporo ni nk’icyangombwa kikuranga cyakorewe kwerekanwa aho wajya hose mu isi, mu gihe viza yo ari uruhushya wasabye igihugu ushaka kujya gutembereramo,gusurayo abantu,kwigamo,gukorayo n’izindi mpamvu.Muri Afurika hari ibihugu byinshi wajyamo utabanje gusaba viza,ukagendera kuri pasiporo gusa,wagera ku kibuga cy’indege cyabo bkakubaza ikikugenza,bakwemerera bagateramo cachet byasaba kwishyura ukishyura,hakaba n’iy’ubuntu.

Abanyaburayi bo barabikemuye,hagati muri bo nta pasiporo nta na viza habe n’akajeto bakeneye ngo batembere ku mugabane wabo(UE) mo imbere

Abaturage bose batuye mu bihugu bigize Umuryango w’Ubumwe bw’Uburayi(UE) ntibakeneye gutunga pasiporo cyangwa gusaba viza igihe batembera. Imipaka ntigenzurwa keretse hari impamvu ikomeye yo kubikora. Biramutse bibaye werekana indangamuntu gusa kandi nta n’aka jeto baguha. Uba wisanga.

Bakoze icyo bise “espace Schengen” amasezerano hagati yabo ko uwinjiye mu gihugu kimwe cyangwa utuye mu gihugu kimwe yemerewe kugenda uko ashaka uko abyumva igihe abishakiye ntawe asabye uruhushya. Ibyo bihugu byabyemeranyijweho muri ayo masezerano ni ibihugu 22 byo ku mugabane w’iburayi mu bihugu 27 biwugize. Ibitaremererwa ni Hongrie,Bulgarie,Croatie na Chypre. Hari n’ibindi bihugu bitari no mu Muryango wunze ubumwe bw’uburayi byasabye nabyo gukurirwaho iyi mipaka mitindi ari byo Islande, Norvège, Suisse na Liechtenstein.Ubwongereza bwo buherutse kuvamo.

Niba uhawe visa (uruhushya rwo kuza muri kimwe muri ibyo bihugu) wafatiraho ugatembera mu bisigaye byose nta wongeye no kukubaza kwerekana ibyangombwa n’uruhushya.Iyo washyitse mo imbere,uba wisanga. Ni nka kurya bigenda hagati ya Kenya,u Rwanda na Uganda,ariko ho usabwa guca ku mupaka (cyangwa ku kibuga),hakaba igenzura,bakaguha aka jeto n’iminsi utagomba kurenza,n’ibindi.Iyo hagati yabo byajaguye,imipaka ifungwa uko babishatse izo gahunda zigahagarara cyangwa abaturage babyo bakirukanwa.Si nka UE kuko ho nta n’imipaka ihari,iyo waciye hasi ntunamenya ko wageze mu kindi gihugu,wenda ubibwirwa n’ibyapa byahindutse cyangwa ikarita ya google.

Niba ushaka kuza mu Bufaransa(ukanafatiraho gutembera uburayi bwose) wakora iki?

Urebye usabwa PASIPORO y’igihugu cyawe, ugasabwa kusaba VIZA (uruhushya rwo gutembera mu Bufaransa rutangwa na Ambasade yabwo iwanyu cyangwa indi iyo ari yose ya bya bihugu twavuze haruguru) hamwe n’AMAFARANGA azagutunga,uzakoresha ingendo zawe zose.

Niba rero witeguye,reka nguhe agashumi(link) ukandaho ugafata inyandiko wakuzuza usaba visa. Niba ukoresha telefoni gusa,hita ukanda hano uvome application yabigenewe.

Niba ukoresha ubundi buryo bwose, kanda hano ukore dosiye isaba viza udusure.

Kanda hano niba ari ugusura gusa no gutembera ukagaruka iwanyu

Kanda hano niba ushaka viza yo kuza kwiga

Kanda hano niba ushaka viza yo kuza gutura igihe kirekire

Kanda hano niba ushaka viza yo mu bihugu byose bigize ya masezerano ya espace schengen

Reba hano pasiporo zemerewe kkujya mu bihugu byinshi utabanje gusaba visa.

Pasiporo y’u Burundi yakugeza mu bihugu 50 utabanje gusaba visa, byiganjemo ibya Africa, n’ibindi nka Haiti, Indonesia, Singapore, cyangwa Bolivia.