Urukiko rwa Red Deer, muri Alberta, ni rwo ruri guca uru rubanza rukurikiranwa cyane muri Canada no mu banyarwanda batuye muri diaspora. Kuva ku wa 21/09/2026, Eli Ndatuje, umupolisi wa Royal Canadian Mounted Police (GRC), ari imbere y’Urukiko rwa King’s Bench rwa Alberta ashinjwa ibyaha byinshi bifitanye isano no gukoresha sisitemu ya mudasobwa ya polisi y’igihugu no kohereza amakuru yaba yaragejejwe kuri Guverinoma y’u Rwanda.
Ndatuje, ufite imyaka 39, yavuze ko ahakana ibi byaha byose (not guilty). Ari kuburana ahakana. Urubanza ruri imbere y’umucamanza, ibyaha byose uyu munyarwanda ufite ubwenegihugu bwa Canada ashinjwa ntarabihamywa n’urukiko.
Elie NDATUJE
Ni idosiye yatangiye mu kwezi kwa 4 umwaka wa 2022
Intangiriro y’uru rubanza ishingiye ku bushakashatsi bwakorewe muri Canadian Police Information Centre (CPIC), ari yo sisitemu y’igihugu cya Canada ituma inzego z’abapolisi zibyemerewe zibona amakuru atandukanye ajyanye n’ibyaha n’iperereza rya polisi.
Ubushinjacyaha buvuga ko Ndatuje yakoze ubwo bushakashatsi ubwo yari ari gukorera muri Red Deer, hanyuma ngo akaza gusohora hanze y’urwego rw’abapolisi amakuru yabonye muri ubwo bushakashatsi nta burenganzira abiherewe.
Inyandiko z’ubushinjacyaha Public Prosecution Service of Canada (PPSC) zigaragaza ku mugaragaro ko Ndatuje aregwa icyaha giteganywa n’ingingo ya 18(1) ya Security of Information Act, kijyanye no gutanga amakuru atabifitiye uburenganzira ayaha ikindi gihugu ari cyo Guverinoma y’u Rwanda. Hari kandi ibindi byaha bibiri ashinjwa: gukoresha nabi icyizere yahawe kubera umwanya yari afite (breach of trust) no gukoresha mudasobwa ya polisi atabifitiye uburenganzira, hakurikijwe amategeko ahana ya Canada.
Ibyo aregwa ko yakoze bivugwa ko byabereye muri Red Deer ku wa 23/04/2022.
Yafashwe mu kwa 2 k’umwaka wa 2024
Nubwo ibyabaye bivugwa ko byabaye muri 2022, uru rubanza ntirwahise rumenyekana ku mugaragaro, ubu hashize hafi imyaka ibiri rushyizwe hanze.
Ku wa 10/02/2024, itsinda rya GRC rishinzwe iperereza ku byaha by’umutekano w’igihugu, ari ryo Integrated National Security Enforcement Team (INSET), ryataye muri yombi uyu Elie Ndatuje.
Icyo gihe, GRC yari yatangaje ko uwo mupolisi yari yinjiye muri sisitemu zirimo dosiye zitari ku rwego rwa “Top Secret”, ariko ko uburyo ayo makuru yaba yarakoreshejwemo bwari bwateye impungenge kuko hari indi leta y’amahanga yari ibiri inyuma. Icyo gihe ntihahise hatangazwa iyo leta yamukoresheje cyangwa yakoreye. Nyuma ariko,amakuru amaze kwemezwa,inyandiko z’urukiko zagaragaje ko iyo leta yari Repubulika y’u Rwanda.
Ibyo Ubushinjacyaha buvuga
Mu itangira ry’urubanza, umushinjacyaha Kent Brown yasobanuye ko ibimenyetso by’Ubushinjacyaha ahanini bizaba bigizwe n’inyandiko, kandi ko abatangabuhamya bagera kuri 13 bamushinja bashobora kuzahamagarwa gutanga ubuhamya.
Nk’uko Ubushinjacyaha bubivuga, uru rubanza ahanini rwibanda ku bintu bibiri: amakuru y’ibanga Ndatuje yakuye muri sisitemu y’amakuru ya polisi y’igihugu no kuba yaba yarahaye mu ibanga ikindi gihugu ayo makuru yabonye mu bubiko bw’amakuru bwa polisi y’igihugu.
Ubushinjacyaha kandi burashaka kugaragaza imiterere n’impamvu z’itumanaho ryabaye hagati ya Ndatuje n’umukozi wa ambasade y’u Rwanda muri Canada.
Inyandiko z’itumanaho rya telefoni zatanzwe mu rukiko zigaragaza koko telefone Ndatuje yahamagaye n’ubutumwa bwanditse yahererekanyije hagati ye n’umukozi wa ambasade y’u Rwanda mu gihe gifitanye isano n’ibyo aregwa. Izo nyandiko zigaragaza ko habayeho itumanaho, ariko ubwazo ntizigaragaza ibikubiye muri ibyo biganiro.
Abunganira uregwa bo bavuga ko koko ayo makuru yatanzwe ariko ko yari ayo gushakisha umuntu waburiwe irengero
Uwunganira Ndatuje, Robb Beeman, yabwiye urukiko ko umukiliya we atakoze nk’umukozi (agent) cyangwa intasi ya guverinoma y’amahanga. Ahubwo, ngo Ndatuje yashakaga gusa gufasha inshuti ye bwite yakoraga muri Ambasade y’u Rwanda i Ottawa.
Nk’uko ubwunganizi bubivuga, ngo uwo waburiwe irengero yari umukozi wo mu rugo wakoraga mu rugo rw’Ambasaderi w’u Rwanda i Ottawa, wari waburiwe irengero kandi abantu bakaba bari bafite impungenge ku buzima bwe n’aho yaba ari.
Nk’uko iyi nyandiko ibivuga, iyo nshuti bwite ya Elie Ndatuje yamuhamagaye imubwira iby’iki kibazo. Ndatuje ngo yamugiriye inama yo kumenyesha byemewe n’amategeko iby’uko kuburirwa irengero polisi ya Ottawa. Nyuma yaho, ngo nibwo yibwirije ubwe kwinjira muri sisitemu ya CPIC kugira ngo arebe niba uwo muntu yari yaratangajwe nk’uwaburiwe irengero.Ni uko yisobanura mbese.
Ubwunganizi buvuga ko muri iyo sisitemu hatabonetsemo idosiye y’umuntu waburiwe irengero ihuye n’uwo mugore wakoraga mu rugo rwa ambasaderi, kandi ko nyuma yaje kuboneka ari muzima kandi nta kibazo afite.
« Sinigeze mba intasi »
Urukiko rweretswe amashusho n’amajwi by’ikiganiro (interogatwari) Ndatuje yagiranye n’abashinzwe iperereza.Muri icyo kiganiro cyabaye ako kanya nyuma y’ifatwa rye, Ndatuje yahakanye ku buryo bweruye ko ari intasi y’u Rwanda.
« Sinigeze mba intasi. »
Nk’uko byatangajwe mu makuru y’iburanisha, yisobanuye avuga ko yiyinjije muri sisitemu ya polisi kuko yashakaga kumenya niba uwo mukozi wa ambasaderi w’u Rwanda waburiwe irengero yari yaratanzweho raporo y’uko yaburiwe irengero koko. Yavuze kandi ko uwo mukozi wa ambasade y’u Rwanda ubwe atigeze amusaba kwinjira muri sisitemu ya polisi kumushakiramo amakuru.
Itumanaho Ndatuje yagiranye n’abahagarariye u Rwanda muri Canada ni kimwe mu bintu by’ingenzi muri uru rubanza. Ubwunganizi bwe bwemera ko Ndatuje yavuganye inshuro ebyiri zitandukanye n’Ambasade y’u Rwanda.
Ubwa mbere avugana na ambasade y’u Rwanda muri Canada hari mu kwa kane kwa 2022,yisobanura avuga ko byari bifitanye isano n’ibibazo byerekeranye na pasiporo y’umugore we mbere y’urugendo rw’umuryango wose bajya mu Rwanda.
Ubwa kabiri avugana na ambasade y’u Rwanda muri Canada ngo byari bifitanye isano n’impungenge zari zatewe no kubura k’umukozi wo mu rugo rwa ambasaderi.
Ku ruhande rw’Ubushinjacyaha ariko, buvuga ko ayo makuru y’itumanaho agomba kuzarebwa mu murongo wo kwinjirira u Rwanda muri sisitemu za polisi y’igihugu cya Canada Elie Ndatuje yakoze. Ngo nicyo cyaha akurikiranyweho.
Kuki abashinzwe iperereza bakeka uruhare rwa Leta y’u Rwanda ?
Uru rubanza rwanatumye havuka ibibazo ku buryo ikibazo cy’umuntu waburiwe irengero cyageze kuri Ndatuje.
Constable Nathan Ashley, ari na we wari ukuriye iperereza mu itsinda rya INSET, yasobanuye ko abashinzwe iperereza bibajije impamvu abayobozi b’u Rwanda batari bahamagaye ubwabo abapolisi ba Ottawa ngo bayibwire ko uwo muntu wabo bavuga ko yaburiwe irengero.Ubusanzwe ufite icyi kibazo ahamagara urwego ntahamagara umuntu ku giti cye.
Urukiko rwumvise kandi Melissa Joan Russell, wari umwe mu bayobozi bakuriye Ndatuje mu kazi.
Yamuvuzeho ko yari umupolisi ukora cyane kandi ugira ishyaka, kandi avuga ko atigeze abona ibimenyetso by’imyitwarire y’uburiganya cyangwa ubucabiranya mu kazi ke. Ubu buhamya bwatanzwe n’ubwunganizi mu rwego rwo kugaragaza imyitwarire rusange y’uregwa mu kazi.
Uru rubanza rurenze ikibazo cyo gukoresha gusa sisitemu y’amakuru y’ibanga
Uru rubanza rufite umwihariko kubera ko ruhuriramo ibibazo byinshi: kurinda amakuru ya polisi, inshingano z’abapolisi mu kazi kabo, umutekano w’igihugu cya Canada, n’imibanire hagati ya Canada n’abahagarariye ibihugu by’amahanga muri dipolomasi.
Ikibazo nyamukuru kigomba gusubizwa n’urukiko ni ukumenya icyo Ndatuje yakoze mu by’ukuri, impamvu yabiteye, n’uko ibice byose bigize ibyaha aregwa byagaragajwe ku buryo butasigira umucamanza ugushidikanya uko ari ko kose.
Uyu munsi urubanza rugeze he?
Nyuma y’uko Ubushinjacyaha burangije gutanga ibimenyetso, impaka za nyuma z’ababuranyi zari ziteganyijwe kubera imbere y’Urukiko rwa King’s Bench i Red Deer. Amakuru aheruka kuboneka ku mugaragaro agaragaza ko urubanza rwari ruteganyijwe gukomeza mu mpera z’uku kwezi kwa 9 no mu ntangiriro z’ukwa 10.
Ibyo wazirikana mu ncamake
Eli Ndatuje ni umupolisi wa GRC uri gukurikiranwa n’ubutabera muri Alberta mu rubanza rufitanye isano n’ikoreshwa rya sisitemu ya CPIC ndetse no gukuramo amakuru y’ibanga we ubwe akayashyikiriza Guverinoma y’u Rwanda. Ubushinjacyaha buvuga ko uko kwinjira muri sisitemu gukuramo amakuru no kuyatanga hanze ari icyaha cyo gukoresha mu buryo butemewe n’amategeko sisitemu y’amakuru ya polisi y’igihugu. Ubwunganizi bw’uregwa bwo buvuga ko uko kwinjira muri sisitemu kwabayeho koko ari ko ko kwari kugamije gusa gufasha gushakisha umukozi wo mu rugo rwa ambasaderi w’u Rwanda muri Canada ngo wari waburiwe irengero. Urubanza ruracyakomeje mu rukiko, kandi ibyaha Ndatuje ashinjwa biracyategereje kugaragazwa n’ibimenyetso bihagije.
Sources:
Public Prosecution Service of Canada (PPSC); The Canadian Press; CityNews Edmonton/Calgary; amakuru y’iburanisha ryabereye imbere y’Urukiko rwa King’s Bench i Red Deer.
Aramutse ahamwe n’ibi byaha byose uko ari bitatu, ibihano ntarengwa biteganywa n’amategeko ya Canada byaba ari ibi bikurikira:
Icyaha aregwa
Ingingo y’amategeko
Igihano ntarengwa
Gukoresha nabi icyizere cyahawe umukozi wa Leta
Ingingo ya 122 y’itegeko mpanabyaha (Criminal Code)
Ingingo ya 18(1) ya Foreign Interference and Security of Information Act
Iyi si:
Mwalimu Hakizimana Maurice ni umwarimu (enseignant) umusemuzi n’umuhinduzi (traducteur-interprète) n’umwanditsi (écrivain) ukorera i Paris,mu Bufaransa.
Mwalimu Hakizimana Maurice ni umwanditsi w’igitabo “UTABA AMATEKA NTABONA ITAKA” Editions Scribes cyavuyemo iyi nyandiko yose.
UTABA AMATEKA NTABONA ITAKA kiboneka no muri format électronique (soft copy) unyuze hano: https://www.amazon.it/Utaba-Amateka-Ntabona-Itaka-Afrikaans-ebook/dp/B0GTQZ4CBC?fbclid=IwVERDUARzok1leHRuA2Flb
KWAMAMAZA
TIDAS – Traduction (guhindura mu ndimi inyandiko), Interprétariat (gusemura) &Accompagnement dans vos démarches d’asile et de séjour en France” (gufasha byose mu bijyanye n’amadosiye asaba ubuhunzi, gutura, no kubona ibyangombwa byose byo gukorera no kuba mu Bufaransa)
Murakaza neza muri TIDAS
Intego yacu: gufasha abanyamahanga baba mu Bufaransa guhangana n’imbogamizi z’ururimi n’iz’ibyangombwa byose.
Serivisi zacu:
Itumanaho n’ubusemuzi mu gihe cyo guhura n’abategetsi cyangwa gushyira ku murongo dosiye zawe Kugufasha dosiye zo gusaba ubuhungiro
Ubufasha bwose mu bijyanye n’amadosiye yo gutura, no kubona ibyangombwa byose byo gukorera,kwiga no kuba mu Bufaransa
Hamwe na TIDAS, ubona serivisi ya kinyamwuga, yemewe n’amategeko; yita ku bantu kandi yizewe.Twizera ko buri muntu akwiye gutegwa amatwi no gufashwa.
Twandikire uyu munsi tuvugane ku mushinga wawe kuri (+33) 07 58 90 35 49 cyangwa utwandikire kuri tidasetvous@gmail.com
